السلام عليكم و رحمه الله و بركاته

و كل سنه و انتو طيبين بمناسبه عيد الفطر المبارك

يعنى لو لاحظتوا يعنى -للى متابع يعنى- ان ده اول تدوينه بالعربى هنا, و انا كاتبها بالعربى عشان كذا سبب يعنى…. عشان بيبقى محسوس اكتر و عشان كمان مايفهموش غير اللى بيتكلمو عربى

نخش فى الموضوع

انا فاكر زمااان اوى اول مره رحت اصلى العيد مع ابويا….. مكانتش الامكن بتاعا الصلاه كتير طبعا زى دلوأتى ف كنا بنصلى فى حته كده يعنى ممكن نقول على بعد نص كيلو من البيت , انا مش فاكر غير انى ساعتها كنت مبسوط اوى وانا سامع التكبيرات من البيت و كأنها جايه من السما

و ماظنش كانو بيستخدو الميكروفونات ساعتها

كان احساس جميل اوى كده و الناس كلها مع بعض فى نفس واحد بيقولو نفس الكلمه, كان صوتها عالى قوى

نيجى دلوأتى بقى………..الاماكن كتييير اوى للصلاه و محطوط سماعه من النوع التقيل كل 10 متر ولا حاجه و تلاقى اتنين ماسكين الميكروفون و كل واحد يبدع حبه

و تقريبا مفيش غيرهم اللى بيكبرو

انا بقى عايز استرجع ذكريات الطفوله و نفسى اسمع الصوت بتاع ال سما  ده

اعمل ايه بأاااا رحت جامع عندنا ف اسكندريه اللى اعرفه عنه انو بيصلى فيه ناس اعدادها بالميت الف و المليون, يعنى رقم و جمبه خمس اصفار ف وش العدو

نبص بأا هناك, هوا تقريبا الناس حالفه ما يعملو حاجه مع بعض ابدا تانى

الناس بيبقو متقسمين تلاتين نوع…. حبه كل واحد بيتكلم مع اللى جنبه و حبه بيتفرجو على موبايلاتهم و حبه خدتهم روح الفوتوغرافيا -او فرحانين بموبايلاتهم اللى بكامارتين- و واقفين يصورا باقى الناس و حبه مركزين مع الشباب اللى بتوزع هدايا للاطفال عشان يقوللو هات اتنين للواد و اخته اللى نايمه فى البيت و حبه باصين فى الارض و مابيعملوش اى حاجه “خالص” و الباقى تقريبا بيبقى مطبق ف بيكبر و هوه نايم

😀 اه كمان كان فى واحد جنبى ماسك علم السعوديه و لابس لبس غريب كده زى الناس بتاعت الزار و الكلام ده هوه تقريبا شافنا متوحديين اوى فا حب يدورلنا على حاجه تفرقنا

انا كل اللى غايظنى ان الناس كلها تحس انها مكسوفه تكبر

يعنى تقدر تقول كده لو جبت صوت كل اللى كانو هناك و حطيته ف حله مش هايجيب صوت عشره بيشجعو مصر فى الدورى العام

نفسى اعرف امتى هانعمل حاجه مع بعض, حاجه واحده

يعنى انا شفت قبل كده الناس و هيه بتحاول تتحد ف رأى, و هوه كان عشان النتيجه اللى على التليفون بتاعت جامعه عين شمس

طبعا مش هاقولوا النجاح الساحق اللى عملناه ف اننا حاولنا نقبى خمسه ميتصلوش, كل الناس كانت بتشتغل نفسها و تجيب اسباب غريبه و تتصل و تقول مش هاتفرق الكام جنيه دول ف داهيه الفلوس بس اعرف النتيجه النهارده عشان لازم اعرفها النهارده عشان مينفعش استنى لبكره عشان هوه كده

وطبعا البنات احاسيسها مبتستحملش و لو معرفتش النتيجه -اللى هتغير مصير الكون- النهارده هايحصل اى حاجه بتعمل اى حاجه

بس اهم حاجه مانعملش حاجه مع بعض

مع ان دى حاجه قويه جدا مع الناس و متهيألى بانت قوى لما حاولو يخلو الانترنت فى مصر محدود و معظم الناس كانت “فعلا” هاتقاطع و القرار ده اتلغى

نرجع ل موضوعنا….. ليه بأا الناس مش بتفتح بقها يعنى لو قلنا ان فى الحاجات اللى فاتت دى هاتضحى شويه عشان نكون مع بعض ف حاجه, هنا بقى هتاخد ثواب ف كل كلمه بتقولها و فى الاخر هانحس اننا اقويا و الناس هاتعملنا حساب حتى لو كنا صوت بس, اما كدا احنا لا صوت ولا صوره

ف ايه بأا…..هاه ؟ ……ايه ؟

يعنى احنا المفروض كنا قاعدين فى شارع واسع و فجأه كده و احنا قاعدين….اسف و احنا نايمين  “يا كريييييييييييييييييييييم”……. ﻷ ..ده مش الراجل بتاع السعوديه بيدروش

ده طفل ممكن نقول كده عنده 15 سنه و اكيد كان بينادى على واحد اسمه كريم الناحيه التانيه يعنى

المهم…. كريم رد….عرفت منين ؟…….عشان الواد ماناداش تانى

طيب و ايه المشكله

ﻷ… نحسبها

ناخد مقطع من الشارع من الرصيف للرصيف ب عرض 3 بنى ادم و ب طول 15 بنى ادم – مع انها اكبر من كده- و نشوف

نفترض ان الواد فطر امبارح ممبار و اتعشى كوارع و فطر فول و بكامل صحته و لما نادى راح مطلع 80 ديسيبل و الصوت ده وصل !!! يعنى الشريحه اللى فى النص دى مقدرتش تعمل صوت ب 60 ديسيبل حتى

Constructive Interference و المفترض ان الناس دى كلها بيقولو نفس الكلمه و بادئين مع بعض يعنى هيحصل

و الموجات تتجمع على بعضها

يعنى كده كل واحد من الناس اللى فى الشريحه ده الموضوع واقف عليه الموضوع 1.5 ديسيبل  بعد الخصم

طبعا ده مش صح بس نفترض

هوه اساسا  الكلام العادى 70 ديسيبل ….  يعنى لو كل واحد من ال45 بنى ادم دول كان بيتكلم بس, مش كان الكلام موصلش ل كريم, كان زمان كريم اتخرم اساسا

ف ياريت الواحد و هوه رايح يصلى العيد كده يعمل حسابه ف اتنين تلاته ديسيبل زياده بس

و الديسيبلات كتير والله…. يعنى فى مطشات الكوره بتلاقى دسابل بتتحدف عليك من كل حته, ده غير الكراسى و الكبايات و المعالق و كده – بتختلف من اهلاوى ل زملكاوى –  ف ياريت بعد كده نكبر “كلنا” مع بعض

اكيد فيه فرق كبير بين صوت التكبير هنا

و هنا

طبعا انا مليش دعوه بالناس اللى فى الفيديوالاول ده, بس هوه ده الصوت اللى بقى ف كل الجوامع

و بالنسبه للفيديو التانى هوه الصوت نفسه واطى بس تحس ان التكبير بيهز السما

احلى حاجه فى الموضوع ان بعد الصلاه و الخطبه ما خلصوا لقيت واحد كده فجأه بيقول بصوت من اللى انا مفتقده ده (خيبر خيبر يا يهود , جيش “مبارك” سوف يعود) ….على اساس انو خرج ابل كده

😀 هوه شكله كان عايز يعمل مظاهره بس خايف يتقبض عليه

هوه شكله مش فاهم اننا مش هانتحد الا لو قالو هانحدد الانترنت

!!!!!!!و اهو العيد فرحه

يا ريت بس لو حد عايز يتناقش يبقى على المدونه نفسها عشان يبقى الكلام كله فى حته واحد