و بدأت السنه الجديده بقنبله فى كنيسه

الحمدلله انى كنت نمت قبلها عشان مكنتش هعرف انام

 

المهم

انا رأيي من زمان فى المواضيع دى انها بتتعمل الاول و بعد كده تتربط بالدين عشان هى دى الحاجه اللى شعب مصر بيعمل انه بيخاف عليها, كل واحد ميعرفش من دينه غير ان التانى ده مش معايا يبقى ضدى

!طيب يعنى ايه بتتعمل و بعد كده تتربط بالدين؟

يعنى الموضوع انا شايفه سياسى بحت

سواء من اللى حاكمين البلد بالعافيه او من ولاد القرود

..و انا ميال للتانيه اكتر

الاولانيين ممكن يعملوا كده عشان يغطوا على مصيبه سوده هيعملوها بعدين او بيعملوها, و لازم اللى يغطوا بيه يبقى حاجه اقوى, لو هى كده فعلا ف ربنا يستر

 

التانيين و دى اللى انا شايفها اوقع ان ولاد القرود هما اللى بيعملوا كده

!طيب هيكسبوا ايه؟

نشوف

دلوأتى الشعب بيكره الحكومه

ف كل ما القمع يكتر و الغلطات تكتر الشعب هيثور اكتر

و الحكومه من وجهه نظرى بين نارين, نار المعاهدات و البلاوى اللى راحولها برجلهم و نار ان الشعب مش طايقهم عشان الكلام ده بييجى على دماغهم فى الاول و فى الاخر

ف عمر الحكومه ما هتقدر ترضى الطرفين

 

طيب ييجى بأا دور ولاد القرود

نقول تانى

الشعب بيكره الحكومه

و ولاد القرود بيكرهوا الحكومه والشعب و اديانهم و اشكالم و الوانهم و اجناسهم و البلد

!يعملوا ايه ؟

نقسم البلد دى شعب و حكومه (وقد كان) و يضربوا فى بعض شويه

الحكومه هنجيبها بكام معاهده و اتفاقيه و نمسكلها كام زله

الشعب يتقسم مسلمين و اقباط و يضربوا فى بعض شويه احنا ندى كام اسفين بس و هما هيقوموا بالباقى

و بما ان مصر نسبه المسلمين فيها اكتر من المسيحين يبقى نقسم المسلمين كمان حته

اخوان و سلف و حط حبه شيعه و هاتلنا من الصنف بتاع البهائيين ده رش حبه و خلى اى اتنين من اى حته يتخانقوا مع بعض و كل واحد هيمسك فى اصحابه و هيقول واه فصيلتاهو ده بيحصل

 

و بالنسبه للى ملوش فى الدين و مش فارقه معاه ليه فى الكوره

اهلى و زمالك

 

ممكن تفتكروا انى مكبر الموضوع بس انا شايفه منطقى

مش لازم يعنى يكون فى واحد من اولاد القرود وسط الناس بأا و مركب شنب و الافلام العربى دى

!انا متأكد انهم على المنتديات و الفيس بوك و شغالين مواضيع من الكلام اللى بيسخن ده و هيسيبوا الباقى علينا, منطقى ولا ﻷ ؟

 

طيب هيكسبوا ايه من الاخر ؟

الشعب هيضرب فى بعضه

و محدش هيبقى طايق حد

يضربوا اسفين بين الشعب و الحكومه

خدوا بالكوا كل شويه الاخبار اللى بيطلعوها زى الاخبار بتاعت التعاقدات بتاعت الغاز الجديده ولا الى بيقولوا ان مبارك عملنا حاجات كتيره ولا كانوا فرحانين بالسفير اللى زرعلهم شجره دى

سواء صح ولا غلط دى بتخلى الشعب يغلى و يشيل جواه

الشعب يهيج اكتر و الحكومه تضغط اكتر ولو للحفاظ على النظام

 

اكيد هيحصل نقطه انفجار

و فى اى حال من الاحوال البلد هتتقلب و كله هيمسك فى بعضه, و كل واحد يطلع القديم و الجديد فى التانى و بكده البلد هتبقى اضعف ما يكون

 

فى اسهل من كده فريسه ؟

 

ده رأيي و اللى بشوفه كل ما بسمع حاجه من دى, ف عندى كام رساله كده لحبه ناس

 

:الاقباط المضطهدين

فكروا تانى فى ازاى انتوا مضطهدين كده؟

الاعتقالات شغاله للاخوان على ودنه

اى حد ملتحى بيتبهدل فى اى مكان, مره كنت مسافر و معانا شاب ملتحى فى العربيه الظابط نزله و فضل موقفه فى الشارع ربع ولا نص ساعه و كشف على بطاقته و استجوبه حبه من غير اى سبب

المنقبه بيطلع عينها فى اى حته

مش القنوات الاسلاميه دى اللى اتمنعت ولا ايه

 

ف اذا كان الاضطهاد انكوا مش عارفين تمارسوا شعائر دينكوا ف دول بردوا مش عارفين يمارسوا شعائر دينهم

 

!طبعا مش هنقول بأا موضوع الخدمات اللى فى المصالح الحكوميه

الناس دى معندهاش حاجه اسمها مسلم ولا مسيحى ولا بوذى حتى

الدرج عنده مفتوح لجميع الاديان و الاعراق! يعنى مفيش عدل اكتر من كده

تديله الشاى بتاعههيظبطك من غير ما يبص على الصليب اللى فى ايدك

 

.نقطه صغيره بس

مش هنكر ان ممكن ناس فعلا بتعاملكوا بطريقه مش مظبوطه, و دول مش بيعملوا حاجه صح من ناحيه الدين الاسلامى نفسه عشان مالتزمش بالعدل اللى هو مأمور انه يطبقه, و غالبا هو مبيعملش كده من ناحيه دينيه هو بيعمل كده من ناحيه قبليه مش اكتر اللى هو قبيله المسلمين

 

و لو اشتكيته للى اعلى منه و معملش حاجه ف ده مش عشان هو متحيز لمسلم ولا حاجه

ده ﻷنه مش فاضيلكوا انتوا الاتنين و راه سبوبه تانيه

!او ﻷنه بيروقراطى عايز الحرق و مش هييجى على زميله عشانك, حط فى دماغك دايما انك مش تبع قبيله الموظفين

 

حاجه تانيه بس اصغر

انا من الاسكندريه و الكنيسه دى فى شارع عرضه خمسه سته متر ولا حاجه و فى الناحيه التانيه بالظبط فى جامع كبير يعنى القنبله انفجرت قدام كنيسه و جامع

 

:صديقى اللى عمال بيبعتلى رسايل عشان اقاطع الاقباط واللى بيعملوه واللى بيتشددلهم و ان الحكومه بتحابيلهم عشان خايفه من امريكا

 

اولا الحكومه بقت تخاف من اى حد الا علينا

ثانيا حتى لو انت صح, هل ده وقته ؟! هل انت شايف ان البلد او اللى مستنيين اى حاجه تشغلنا عشان يتدخلوا اكتر و ساعتها انت هتبقى من اللى ساعدوا فى كده

و موضوع كاميليا ده بالذات بأا انا شايفه سياسه من اوله ﻷخره

!ما حصلت كتير ان اقباط اسلموا اشمعنا دى اللى قفشوا عليها و اشمعنا دى اللى الاعلام اهتم بيها اوى كده؟

مش ملاحظ كده ان فى الوقت ده كان فى حاجات تانيه دايره فى البلد و لازم حاجه تغطى عليها ؟

 

ما اصل بالعقل كده انت مش هتعرف و مش فاضى تركز فى اكتر من حاجه مع بعض ف وانت قاعد كده مش عاجبك اللى حصل لخالد سعيد خد كاميليا, لو انتوا خمسه اتنين يركزوا هنا و الباقى هنا

حبه الدستور و ابراهيم عيسى و حبه نقفل القنوات الاسلاميه و حبه انتخابات بأا

بقى كل واحد ماسك حته بيزعق فيها و كل واحد ملوش صوت فى اللى بيعمله فى ارق من كده معارضه ؟

 

كل اللى بقوله اقرا بس ايه اللى بيحصل و ليه

 

:الشعب المصرى

 

!ممكن تكبروا شويه بأا و مش اى حد يسقف ترقصوا ؟

اذا كان مش عاجبكوا طريقه الحزب الوطنى فى التعامل مع المعارضه, ما كلكوا بتعملوا كده

كل واحد مش عاجبه اللى التانى بيقوله الحل الوحيد انه يتنطط ولا يعيط ولا يجيب اصحابه و يعجنه سواء يهزأ فيه ولا يضربه عشان !ميفتحش بقه تانى

 

اى حاجه من دى لا تدل اطلاقا عن ان انت صح او حتى انك مقتنع ولا فاهم انت بتعمل ايه ليه

.ماهو لو انت فاهم كويس يبقى هترد و تقنع اللى قدامك يا إما تروح تفهم و ترجع تتناقش, على الاقل كده انت مش هتبقى غلطان

 

مره كنت قاعد على البحر جه قعد جمبى واحد مسيحى و قعد يكلمنى على دينه عشان يقنعنى بيه و عرفت انه من القاهره و جاى يتفسح

قالى حبه حاجات و رديت عليه و رد بحاجات عكس اللى باسمع انهم معتقدين فيها مش عارف كان بيكدب يعنى ولا ايه الله اعلمو لما ملقاش منى رجا قام

مع انه عايز يشكك الناس فى الاسلام اللى هو دينى و اللى بغير عليه بس احترمته

 

على الاقل هو مقتنع بدينه و عايز ينشره و شغال على كده حتى وقت اجازته ياعنى بيعمل اللى عليه

…انا بقى بعمل اللى عندى حديث فى دينى بيقول بلغوا عنى ولو ايهكنت باعمل ايه ؟! خارج مع واحد صاحبى

 

حل تانى كنت اضربه ولا الم عليه الناس, ده عمره ما كان هيغير المعتقد اللى فى مخه الا لو طلعت مخه

 

مدام انت متأكد من دينك انه هو الصح و انا متأكد ان دينى الصح ولو كنت مش ملم بيه– , ف الصح هو اللى هيكسب فى الاخر, غير كده يبقى انت مش واثق و مدام مش واثق يبقى تقرا و تتعلم و تعرف ازاى ترد رد مقنع مش انك تضربه ولا تعيط

 

يعنى معلش مش عشان انت معندكش دفاع تلومنى انى بهجم

:الحكومه والحكام,

خلوا عندكوا ثقه فى ربكوا ثم فينا

ان دَب الْخَوْف بِأَطْرَافِك…قَطَع اطْرَافُك يَا وَطَنِى فَالْمَرَض خَبِيْث

:اللى بيقرا التدوينه دى

:S !قلتلى انت جهلاوى ولا زبلكاوى ؟